للحقيقه وجوه كثيره
وجوه كتيره للحقيقه....والحقيقه خدها الغراب
إتسربت وسط الكلام...ويمكن وسط العذاب
ويمكن تكون زهقت ما بين حضور وغياب
ويمكن تكون الحقيقه...في الحقيقه..سراب
وجوه الحقيقه بتتغير حسب رأي الزبون
إللي عايزها بالصلصه...وأعصر عليها لمون
وإللي عايزها برباط....بكعب أو حتى بدون
هي دي الحقيقه...وإياك تقول : مجنون
وجوه الحقيقه مريحه جدااا للبال والضمير
تخلي البشاعه جمال...تحوّل الشر خير
وتخلق من الخيانه وفاء نادر كبير
أصلها حقيقه " سبور " ...ما بتدقش كتير
وجوه الحقيقه أوهام في قلب جبان
بيتمنى يلاقي الحقيقه مقاسات وألوان.
يشتري منها موديل..أو حتى عشره كمان
دي الحقيقه دلوقت...ودي غير الحقيقه زمان
الجمعة سبتمبر 12, 2008 5:18 pm
